Literatura en asturleonés en Zamora (XXI) Lluna. Miguel Gelado (Segunda parte)

Despuéis d’instalarnos nel campamentu dos nuesos, cumo on había craridá, quisi facer un pequeñu reconocimientu da touza que chubía por a lladeira d’un monte, al outru llau del ríu qu’arrodiaba a villa. Marchéi cuesta arriba pensando nas mias cousas, sin mirar alredor. Asina, amodo, a nueite foi chegando y a lluna, grande, redonda, tan chena de lluz que tornaba prata os carballos, os teixos y os castañeiros que m’arrodiaban, facía que fora de día en plena nueite.

Enantes de you querer, estaba andando por entre urces y carqueixas. Nun chubía ya pero diba cada vez más aspacio, más cansáu. Desiguida, eillí estaba a lluna, cien pasos delantre de mi, nel mediu una llagona, dando tanta lluz el rellumbre cumo a del cielu. Y you, amusgáu, cásique muertu de caminar con todas as armas, aveiréime al oriella da llagona, deixéi l’escudu nel pisu y echéime sobre’l verde.

Tenía a lluna nos güellos onque los pechara. Nun miraba pa ella más qu’un curtu momentu y agora nun podía deixar de verla. Espurríu na yerba xugaba a abrir y cerrar os güellos y siempre estaba eillí, redonda, y tan guapa cumo una muller.

¿Vía a lluna o una moza? Si yera una muller sería a más guapa que había visto nunca, col cabellu llargu y roxu mui craru. Por un instante nun sabía si estaba espiertu. Erguíme y eillí estaba ella, col augua da llagona hasta a cintura.

Tornóu a cabeza, sonríume y desaparecíu entre as auguas. You entovía de piedra y conas piernas tembrando volví a echarme nel suelu. Nun podía más.

Espertóume una gran ruxideira que venía del augua. Nun yera on de día, pero ya había craridá y dalguna raza de sol chenóu os cumbres das peñas. De nuevo’l ruxíu. Miréi pá llagona y on llonxe vi cúmo s’aconchegaba dalgo a escape. Brinquéi dende’l suelu mientras garraba l’escudu. Saquéi’l gladiu, finquéi os pías nel suelu y entuences, y namás entuences, miréi al frente, por cima l’escudu, aspacio.

¡Por Xúpiter! Yera una culuebra xigante conas escamas cumo de prata y estaba ya nel oriella, a cuatro pasos de mi. Cona cabeza fuera del augua, tenía a boca abierta, a llengua bífida y dous caneiros cumo’l mieu escudu de grandes. Yera aterrador.

D’un testarazu da culuebra, l’escudu saltóu en mil pedazos y you con ellos. Derrengáu nel suelu víame ya nel Eliseu. Lluego a culuebra tiróuse sobre mi cumo si you fora un ratu y entuences vila nos sous güellos. ¡Yera ella! Más tranquilu, sin saber si tenía delantre a Afrodita o al monstruu más fúnebre del orbe, espetéi-le el espada hasta a manu na gorxa; según abríu a boca, p’almorzar col fillu de mia madre.

A bicha desaparecíu, nun había nin cabeza, nin cuerpu, nin el sangre que tenía na manu y nel gladiu. Sin embargu, una muller aparecíu cumo si esperara a mia chegada.

Nun yera ya un sueñu. Yera una muller xoven y formosa; tanto que m’encollíu l’estógamu. Nesti momentu sentí que nun había de separtarme enxamás d’ella. Lluego acercóuse a mi y díxome:

˗ Y tu, ¿quién sos?

˗ You soi Marciu ˗respondí.

˗ You soi Lluna ˗dixo ella nuna fala astur˗, y voi estar siempre contigo.

Y acabóuse.

˗ Vai a xugar ˗dixo’l buelu al rapaz.

Y mientras el niñu marchaba brincando pol patiu, el buelu deixóu arramar una llágrima y volvíu a Hispania, ás tierras dos astures. Entre carballos, ancinas, llagonas y touzas, acompañáu por una guapa muller conos guedellos roxos.

Bibliografía

Cueto Fernández, M. y Viejo Fernández, X. (Ed.) (2012). Onde la palabra pousa. Crestomatía del asturḷḷionés occidental. Xixón: Suburbia ediciones.

Gelado, M. (2008). Lluna. El Llumbreiru, 12.

Gelado, M. (2021). Lluna. En Alonso, S., Xeira. Compendio Gramatical de Sanabrés. Zamora: Furmientu.